استاد بدیع الزمان حضرتلری وفاتنه یاقین بر زمانده اسپارطه لی صفّ اول بویوك طلبه لرندن خسرو افندی ، طاهری موتلو ، سلیمان رشدی ، بویوك روحلی كوچك علی ، ترزی محمد ، كاتب عثمان ، مصطفی كل و نوری بڭلی آدنده كي نور خدمتنده قدملی و ياشجه بویوك طلبه لرینی بر آرایه كتیره رك اونلرڭ حضورنده آشاغیده كی صوڭ وصیتنی قلمه آلدیرمشدر . وصيتنه كندی امضا و مهريني باصدیغی كبی بو سچكین طلبه لرینه ده امضالاتمشدر . خسرو افندی یه تسلیم ایدیلن بو صوڭ وصيتنامه سنده أوچ شیئی وصیت ایتمشدر .

برنجیسی : رسالۀ نورڭ مطبعه لرده باصيلمسيله الده ایدیلن كليرلري ، نور خدمتنده قوللانیلمق شرطیله وصيتده اسمی كچن شخصلره تملیك ایدییور ، بو كليرڭ خسرو ، طاهری ، رشدی ، كوچك علی كبی صفّ اول طلبه لرڭ كوزتیم و اداره سی آلتنده يوڭتيلمه سني ایستەیور .

ایكنجیسی : حیاتنی نور خدمتنە وقف ایدن نور طلبه لرندن محتاج اولانلره حضرت استادڭ بر سوره در ویرمكده اولدیغی تعیینات بدلنڭ ( معاشڭ ) كندیسندن صوڭره دە دوامنڭ بویوك آغابگلری الیله دوامنی ایستەیور .

اوچنجیسی : قبرينڭ اسپارطه نڭ بارله ویا صاو قصبه سنده اولمەسنی وصیت ایدییوردی .

بو وصيتڭ خیرات وقفی آرشيونده بولونان اوريژينالي شویله در :

” بِاسْمِه۪ سُبْحَانَهُ

سعیدڭ وصیتنامه سی

بن سكسان كسور یاشنده ، غایت اختیار ، غایت خسته بولوندیغمدن و اجل ده كیزلی اولمه سندن و نور خدمتندەكي وظيفه مي كوره جك پك چوق حقيقي قرداشلرم بولوندیغندن معنوی بر اخطار ایله بو وصیتنامه می یازییورم .

أوّلاً : مادام صوڭ حیاتمی رسالۀ نوره  وقف ايتمشدم . نورڭ خاص طلبه لرندن بر قسمی عینًا بنم كبی كندیلرینی خدمت ایمانیه و نوریه ایچون وقف ايتمشلر . و بعضیلرینڭ پدر و والده لری ده اونلری نورلره  وقف ايتمش . بنم اولادم اولمادیغندن بن ده اونلری حقيقي اولادم حكمنده بندن صوڭره رسالۀ نوره  عائد مالم ، ثروتمي او معنوی اولادلريمه نورڭ خدمتنه صرف ایتمه لري ایچون اونلره هبه و وقف و تملیك ایتمشم . وفات ایتدكدن صوڭره اونلر صاحب اولاجقلر .

بن ناصل نورڭ خدمتنده اقتصاد ایله بعض تعيينلره ( معاشلره ) صرف ایتديگم كبی ، اونلر دە او وظيفه يي یاپمه یه قطعي قناعتم كلمش . اونلری وارثلرم ( ميراثجيلرم ) دییه اعلان ایدییورم .

بو معنوی اولادلرمله برابر ؛ یگرمی سنه بنم طلبه م و نسبي قرداشم عبدالمجید و اوتوز بش سنه رسالۀ نور خدمتنە كندینی فدا ايدن خسرو و یگرمی كسور سنە طاهری و مصطفی كل و نظيف چلبي و كوچك علي و صدیق سليمان و سليمان رشدي و ( ترزی ) محمد و مخلس و ( كاتب ) عثمان گبي ذاتلر ، بو معنوی اولادلريمه بویوك قرداشلری ( آغابگلری ) نوعنده اونلره یاردیم ایتمك و ناظر و مدبّر اولمه سني رحمت الٰهيدن اونلرڭ موفّقيتنى نیاز ایدییورم .

شیمدیلك خدمت ایمانیه و نوریه یه وقف ایدن و خدمتمده بولونان صونغور ، زبیر ، جیلان ، بایرام ، حسنی ، ييلماز گبي عین اونلرڭ ( آغابگلرينڭ ) ماهیتنده حقيقي اولادم اولارق اونلری قبول ایتمشم . بندن صوڭره بڭا عائد نه وارسه كندیم حیاتده ایكن ویردیگم تعیین كبي تعیینلرینی آلاجقلر. و رسالۀ نورڭ طبعي واسطه سيله حاصل اولاجق سرمایه یی كندینی نوره  وقف ايده جكلرڭ حقيقي محتاج قسمنه بویوك آغابگلری واسطه سیله اونلره تعييناتلريني ویره بیلیرلر .

بارله ده وفات ايدرسه م بارله نڭ یوقاری مزارستاننه ، اسپارطه ده وفات ايدرسه م صاوه مزارستاننه كوتوريڭز . سعید نورسی ( امضا و مهر )

امضالر : طاهری ، خسرو ، رشدی ، كاتب عثمان ، ترزی محمد ، مصطفی كل ، نوری بڭلی “ [١]

[ ١ ] خیرات وقفی آرشيوي كری