رسالۀ نورڭ مطبعه لرده نشره باشلامسی
رسالۀ نورڭ مطبعه لرده نشره باشلامسی
رسالۀ نور طلبه لری ١٩٤٨ ‘ ده آفیون حبسنە كيرمه لرندن ایكی أوچ سنه أوڭجه استاد بدیع الزمان حضرتلری امرطاغدن یازدیغی بر مكتوبله رسالۀ نورڭ مطبعه ایله نشری وقتنڭ كلدیگنی سببلریله برابر شویله افاده ایتمشدی :
” رسالۀ نور بو مبارك وطنڭ معنوی بر خلاصكاری ( قورتاریجیسی ) اولمق جهتیله شیمدی ایكی دهشتلی معنوی بلایی دفع ایتمك ایچون مطبوعات عالمیله تظاهره باشلامق ، درس ویرمك زمانی كلدی ویا كله جك كبیدر ظن ایدرم .
او دهشتلی بلادن بریسی ، خریستییان دیننی مغلوب ایدن و آنارشیلگی یتیشدیرن شمالده چیقان دهشتلی دینسزلك جریانی ، بو وطنی معنوی استیلاسنه قارشی رسالۀ نور ، سدّ ذولقرنین كبی بر سد قرآنی وظیفه سنی كوره بيلير. و ( دیگری ) عالم اسلامڭ بو مبارك وطنڭ اهالیسنه قارشی پك شدّتلی اعتراض و اتهاملرینی ازاله ایتمك ایچون مطبوعات لسانیله قونوشمق لازم كلمش دییه قلبمه اخطار ایدیلدی .
بن دنیانڭ حالنی بیلمه یورم ، فقط آوروپه ده استيلاكارانه حكم ایدن و ادیان سماویه یه طایانمایان دهشتلی جریانڭ استیلاسنه قارشی رسالۀ نور حقیقتلری بر قلعه اولديغي كبی ؛ عالم اسلامڭ و آسیه قطعه سنڭ حال حاضرده كی اعتراض و اتهامنی ازاله و اسكیده كی محبّت و اخوتنی اعاده ايتمەیه وسیله اولان بر معجزۀ قرآنيه در . بو مملكتڭ وطنپرور سیاسیلری چابوق عقلنی باشنه آلوب رسالۀ نوري طبع ایدرك رسمی نشر ایتمه لری لازمدركه ، بو ایكی بلایه قارشی سپر اولسون . “ [١]
حضرت استاددن كلن بو غایت قیمتدار مژده أوزرینه خسرو افندی سرورله طولو شو مكتوبی قلمه آلیر :
” مكتوبڭز محيطمزده او قدر بویوك بر سوینچ اويانديرمشدركه ، بتون طلبه لریڭز بزلر دنیاده ایكن جنتله تبشیر ایدیلمشلر ( مژده لنمشلر ) كبی شو دنیوی حیات ایچنده معنوی بر لذتله قلب و روحمز مسعود اولمش و او لذتڭ ویردیگی سرور و نشئه سيله سینەلریمز طولمشدر. رسالۀ نورڭ مطبعه لسانیله انتشاری و سربستيتنڭ عموميله شمه سي غایه سیله چالیشان طلبه لریڭزڭ … رسالۀ نورڭ مطبعه لسانیله هر الده هر یرده اوقونمه سندن كله جك سوینچ و سرورله بزه یڭیدن حیات ویرمش … “
لكن او ییللرده سورمكده اولان باصقيلرڭ نتیجه سی اولارق رساله لرڭ مطبعه قاپوسیله انتشاری ممكن اولمامشدر . مطبعه اولماسه دە اسپارطه و اینه بولی طلبه لرنجه آلینان تكثیر ماكينه لرينڭ فعالیته كچمه سی صوڭوجي بیڭلرجه عصای موسی ، ذو الفقار و سراج النور و دیگر نور مجموعه لري تكثیر ایدیلمەیه باشلانمشدي .
بو تاریخدن یاقلاشیق اون سنه صوڭره ایسه ، آفیون محكمه سی ، ٢٣ حزیران ١٩٥٦ تاریخنده ، رسالۀ نورده وطن و ملته ضررلی هیچ بر عنصر بولونمدیغنه قناعت ایدرك اثرلرڭ براعتنه و او كونه قدر محكمه ده طوتولان بتون رساله لرڭ صاحبلرینه اعاده سنه قرار ویردی . خبری آلان بدیع الزمان حضرتلری بونی بویوك بر مژده صورتنده خسرو افندی یه شو افاده لرله بیلدیردی :
” نورڭ قهرمانی خسرو قرداشم !
أوّلاً : سزه مژده ! آفیون محكمه سی - مدۀ عمومي ( صاوجی ) مستثنا - متّفقًا بتون رسالۀ نورڭ براعتنه قرار ویرمشلر . اون كونه قدر قرارنامه نڭ صورتنی ده بزه ویره جكلر . مدۀ عمومي تمییز ایتدیگی ایچون رسمًا اون بش كون قدر تأخیر ایتمش . اون بش كونه قدر تام نتیجه ویره جكلر . “ [٣]
نور طلبه لرينڭ روحلرنده بویوك بر سوینچ و فرحلق میدانه كتیرن بو مژده لی خبری خسرو افندی و آرقداشلری درحال توم طلبه لره دویورمق ایچون شو تلغرافی چكدیلر :
” سوگیلی قهرمان قرداشلریمز !
٢٣ حزیران ١٩٥٦ تاریخنه تعلیق ایدیلمش اولان آفیون آغیر جزاسنده كي محكمەمزده بتون رسالۀ نور اثرلرینڭ اعاده سنه اتّفاقله قرار ویریلدیگنی مژده ایدر ، جناب حقّه حدسز حمد و ثنالر ایدرك ، سزلری تبریك ایدوب موفقیتڭزه دعا ایدرز . الباقي هوالباقی قرداشلریڭز خسرو ، طاهری ، مصطفی “ [٤]
آرتیق رسالۀ نورڭ مطبعه لرده نشری ایچون قانونًا هیچ بر مانع قالمامشدي . بونڭ أوزرینه خصوصًا آنقره و استانبولده اوقویان كنچ و یڭی أونیورسیته لی نور طلبه لرندن رسالۀ نوري يڭي حرفلرله مطبعه لرده باصمق ایچون بدیع الزمان حضرتلرینه تكلیفلر كلمه یه باشلادی . اساسًا بو تكلیفلر داها أوڭجه ده كلمش و حضرت استاد یالڭز كنچلك رهبری ایله عصای موسی مجموعه سنڭ یڭی یازی ایله نشرینه مساعده ایتمش و بونلر یڭی حرفلرله یازیلارق چوغالتيلمشدي .
آفیون محكمه سنڭ ویردیگی سربستلك قراری أوزرینه رساله لرڭ یڭی یازیله باصيلمسي ایچون تكرار طلبلر كلمه یه باشلادی . بونڭ أوزرینه بدیع الزمان حضرتلری ، قرآن يازيمزي بیلمه ینلرڭ ، بالخاصّه أونیورسیته كنچلگنڭ الده ایتمه سی ایچون رساله لرڭ یڭی حرفلرله مطبعه لرده باصیلمه سنه اذن ویردی . یوقسه نور طلبه لرينڭ قرآن یازیسنی بیراقارق یڭی حرفلرله اوقومەیه باشلامه لری ایچون دگل ! بو نقطه ، طوغری آڭلاشیلمه سی كركن و أوزرنده دقتله دوشونولمسی ایجاب ایدن مهم بر نقطه در . زیرا أوڭجه كی بحثلرده تكرارله كچدیگی كبی بدیع الزمان حضرتلری نور طلبه لرينڭ قرآن یازیسنی قورويوب دوام ايتديرمه لرينڭ اڭ مهم بر وظيفه لري اولدیغنی ، یڭی حرفلرڭ ایسه رسالۀ نور مسلگنه بتون بتون ضد اولدیغنی دائما و تكرار تكرار وورغولويوردي .
حضرت استاد بو اذنی ده مطلق و صینیرسز بر شكلده ویرمه مشدر . زیرا یینه داها أوڭجه كچدیگی كبی اونڭ یڭی حرفلره اذنی ضرورت مقداری ایله صینیرلیدر . او دوری یاشایان نور طلبه لرينڭ بيلديرديگنه كوره ، استاد بدیع الزمان ، رسالۀ نور طلبه لرينڭ اڭ بویوك بر استادلری اولان حضرت علی ( ر ض ) ایله عالم معناده كوروشمش و صینیرلی بر سوره ایچون لاتین حرفلریله باصمه يه مساعده آلمشدی .
استادڭ طلبی أوزرینه ، أوڭجه دیانت ايشلرینڭ رسالۀ نوري باصديرمسي ایچون تشبّثلرده بولونولمش فقط دیانت بونی كرچكلشديره مەمشدر . بونڭ أوزرینه ، ١٩٥٦ ‘ دن اعتبارًا آنقره و استانبولده رسالۀ نورلر لاتینجه اولارق باصيلمه يه باشلانمشدر .
یڭی حرفلره مساعده ضرورت مقدارنجه در
بدیع الزمان حضرتلرینڭ لاتین حرفلرینه مساعده سی ، او كونه قدر قرآن حرفلریله نشر ایدیلمش اولان رسالۀ نورڭ بوندن بویله تمامًا و یالڭزجه لاتین حرفلریله نشر ايديله جگي آڭلامنه كلمه یوردی . چونكه حضرت استاد ، اوتوز سنه بوینجه بتون كلیاتی - رسمًا یاساق اولمه سنه رغمًا - بیله رك و ایسته یه رك قرآن حرفلریله یازمش و یازدیرمشدی . او هیچ بر زمان بدعه اولارق كوردیگی یڭی حرفلری قبوللنمش دگلدی . بر جهاد شعوری ایچریسنده لاتین حرفلرینه قارشی قرآن حرفلرینی مدافعه ایدییوردی . نور جماعتی خارجنده بولونان و قرآن یازیسنی بیلمه ین انسانلرڭ دە استفاده ایده بیلمه لری ایچون رساله لر یڭی حرفلرله ، زمان و زمینه كوره اولوشان احتیاج مقدارنجه ، لاتین حرفلریله باصيلسه دە ، نور جماعتنڭ ، رساله لرڭ اوریژینال شكلی اولان قرآن یازیسیله اوقویوب یازمەیه و نشر ایتمگه دوام ایتمه لری خطّ قرآني محافظه خدمتنڭ ضروری بر كرگيدي . زیرا حضرت استاد ، قرآن یازیسنی قورومه خدمتنڭ ، ایمانه خدمت ایتمك كبی مهم بر وظيفه سي اولدیغنی شویله بیان ایدییوردی :
” رسالۀ نور زندقه یه قارشی حقائق ايمانيه يي محافظه یه چالیشمسی كبی ، بدعته ( لاتینجه یه ) قارشی دە حروف و خطّ قرآني ( قرآن حرفلری و یازیسنی ) محافظه ایتمك بر وظيفه سي ( در ) … [٥]
بر ایكی كوچك رساله نڭ مطبعه ده باصيلمه تشبّثنڭ نتیجه سز قالمسی أوزرینه حضرت استاد ، ” مسلگمزه مخالف یڭی حروفه ( یڭی حرفلره ) ، رسالۀ نورڭ بر نوع مساعده سی حكمنه كچدیگی ایچون لازم دگل “ [٦] دییه رك لاتین حرفلرینه اولان باقيشني و مسافه سني اورته یه قویمشدی . حضرت استاد دائما رسالۀ نورڭ اصل نشرینڭ قرآن حرفلریله اولمسی و بو یول ایله انسانلرڭ قرآن يازيسندن قوپمه سنڭ اوڭنه كچيلمه سني رسالۀ نورڭ اساس مسلگی و وظيفه سي اولارق كوسترییوردی . ١٩٥٩ ییلنده طبع ایدیلن تاريخچۀ حيات كتابنده بو وظیفه چوق آچیق بر شكلده شویله افاده ایدیلمشدر :
” قرآن خطنی محافظه ایتمك خدمتیله ده موظّف ( وظیفه لی ) اولان رسالۀ نورڭ ، محقّق قرآن یازیسیله نشر ايديلمسي لازمدی . “ [٧]
بونڭله برلكده ، بدیع الزمان حضرتلری لاتین حرفلرینه قاپویی تمامًا ده قپامامش ، لاتین حرفلرینڭ رسالۀ نور خدمتنده ” ضرورت مقدارنجه “ قوللانيلابيله جگنه شو افادەلریله اشارت ایتمشدر :
” رسالۀ نورڭ بر وظيفه سي ، قرآن حرفلرینی محافظه اولدیغندن ، یڭی حرفلره ضرورت درجه سنده ان شأ اللّٰه مساعده اولور . “ [٨]
حضرت استادڭ یڭی حرفلره ” ضرورت مقداری “ كبی بر صینیر كتيرمه سنڭ سببی ایسه لاتین حرفلرینی بدعه اولارق كورمه سندن ایلری كلییوردی . بونی بر قسم افاده لرندن آڭلامق ممكندر . مثال اولارق :
” بو ذات … اهل دنیانڭ نظرنده بر موقع قزانمق املیله مهم بر بدعەنڭ ( یڭی حرفلرڭ ) معلملگنی در عهده ایتدی ( أوزرینه آلدی ) . تمامیله مسلگمزه ضد بر خطا ایشله دی . پك مدهش بر شفقت طوقادینی یدی … “ [٩]
ضرورت مقداری ایسه ، قطعي مجبوريت اولان طوروملرڭ كركدیردیگی مقدار دیمكدر . مثلا فقهده ، آچلقدن أولمك أوزره اولان بریسنڭ ، بولدیغی حرام بر شیئی ییمه سنڭ جائز اولاجغی ، فقط ضرورت مقدارینی آشارق طوینجه یه قدر ييیه مه يه جگي بیلدیریلمشدر .
بونڭ كبی اسكی یازی یی بیلمه ین طیشاریده كی انسانلرڭ ویا نور دائره سنی یڭی طانییان و كیرنلرڭ رساله لردن استفاده ایده بیلمه لری ایچون یڭی یازیله دە رساله لرڭ بولونمسنه احتیاج واردر . فقط أونملی اولان بو مساعده نڭ ضرورت مقدارینی آشارق ، استادڭ افاده سیله ، ” شاكردلرڭ او قولای یازی یی ترجیح ایتمه لرینه سبب اولمامسی “ ، [١٠] نور طلبه لرينڭ عثمانلیجه رساله لری بیراقوب تمامًا لاتينجه لره صاريلمامه لريدر .
خلاصه ؛ اصل خدمت قرآن حرفلريله در . یڭی حرفلر ایسه ضرورت مقدارنجه قوللانيلابيلير . نور طلبه لری ، رساله لری یڭی طانییان بر كیمسه یه لاتین حرفلریله باصیلمش أثرلری ویره بیلیرلر . فقط اڭ قیصه بر سوره ده اونڭ دە خط قرآن دینیلن قرآن آلفابه سني أوگرنه رك رساله لری اوريژيناللرندن اوقومه لرينى صاغلامه یه چالیشمەلری بر وظيفه لريدر . بو طورومی رحمتلی زبیر كوندوزآلپ رسالۀ نوره گيرن افاده لرنده شویله آڭلاتیر :
” یڭی حرف ایله تكثیر ایدیله بیلن عصای موسی اثرینی اوقویان كنچلر ، قرآن حرفلری ایله یازیلمش متباقی ( دیگر ) أثرلری ده اوقويابيلمك ایچون قیصه بر زمانده او یازی یی دە أوگرنييورلر . بو شكلده بر چوق علملرڭ أوگرنيلمه سنه انگل اولان و دیندن ایماندن چیقارمق ایچون تألیف ایدیلن أثرلری اوقومەیه مجبور ایدن ” قرآن خطنی بیلمه مك “ كبی بویوك بر سدی ده ییقمش اولویورلر . “ [١١ ]
خسرو أفندینڭ طلبه لرینه بيلديرديگنه كوره ، یڭی حرفلرله رساله لرڭ باصيلمه يه باشلانمه سندن أوچ سنه قدر كچدكدن صوڭره ، ١٩٦٠ ‘ ە كلينديگنده ، باصیلان مقدارڭ او زمان ایچون كفایت ایده جگنه قناعت ایدن استاد حضرتلری ، باصقينڭ طوردیریلمه سی ایچون ” قرداشم حضرت علی كرم اللّٰه وجهه دن آلدیغم مساعده بیتدی . باصقي يي طورديرڭ “ دییه رك بیڭ باشی خيري بگله خبر كوندرر . بیڭ باشی خيري بگ ایسه ، عاطف اورالله برلكده آنقره ده لاتینجه باصقيلرڭ حاضرلانمه سنده رساله لری داقتیلو ایله یڭی یازی یه كچیرن نور طلبه لرندندر . یینه او زمانلر مكتوبات مجموعه سني یڭی حرفلرله باصان سیّد صالح أوز جان دە آنقره ده كی بر صحبتنده شاهدلرڭ حضورنده ، بدیع الزمان حضرتلرندن باصقي يي طوردیرمق أوزره امر كلدیگنی و كندیسنڭ استاددن كلن بو امر أوزرینه باصقي يي طورديرديغني افاده ایتمشدر . بوندن قیصه بر سوره صوڭره دە بدیع الزمان حضرتلری وفات ایدرك آخرته ارتحال ایتمشدر . [١٢]
مطبعه دن صوڭره یازی خدمتی
بدیع الزمان حضرتلرینڭ آفیون حپسندن صوڭره كی صوڭ اون ییلی اولان ١٩٥٠ ایله ١٩٦٠ ییللری آراسنده رسالۀ نور خدمتنده هم یورت ایچنده ، هم یورت طیشنده بویوك انكشافلر اولدی . نورلر أونیورسیته طلبه لری آراسنده خيزله یاییلییور ، هر كسيمدن انسانلر استادي زيارت ایدییور ، محكمه دن سربستلك قزانان نورلر مطبعه لرده باصيلييور ، عربجه يه ترجمه ایدیلن رساله لر باشده مصر و حجاز كبی اسلام أولكه لرنده انتشار ایدییور و اوراده كی مسلمانلرله باشده حضرت استاد و نور طلبه لری آراسنده مكتوبلاشمه لر اولویوردی .
بتون بو یڭی فعالیت آلانلريله برلكده خدمت اصلی هویتنی ده محافظه ایدرك دوام ایدییوردی . مثلا استاد بدیع الزمان حضرتلرینڭ ” رسالۀ نور طلبه سنڭ اڭ اهمّيتلي وظيفه سي “ اولارق تعریف ایتدیگی نور رساله لريني بالذّات كندی الیله و قرآن حرفلریله یازمق و بو سایه ده بر یاندن رساله لری نشر ایدركن بر یاندن دە قرآن يازيسنڭ محافظه سنه خدمت ایتمه فعالیتی دوام ايتمكده يدي . صوڭ دونمده رساله لرڭ تكثیر ماكینه سیله و مطبعه لرده چوغالتيلمەيە باشلامسی ، طلبه لگڭ اڭ مهم شرطی اولان رسالۀ نوري يازارق چوغالتمه خدمتنی اهمیتدن دوشورمييوردي .
تاريخچۀ حيات كتابنده ، ” آفیون حپسندن صوڭره خدمت نوریه ناصل جریان ایتدی ؟ “ باشلغی آلتنده ماده ماده او دورڭ خدمتلری صيره لانيركن ، رساله لری یازمە خدمتی ایلك ماده ده ذكر ايديله رك او دورڭ خدمتلری شویله جه قلمه آلینمشدر .
” اسپارطه ده ، تكثیر ماكینه سیله نور مجموعه لرينڭ نشرینه دوام ایدیلییوردی . استاد ، یینه عادتی أوزره تصحیحات ایله مشغولدي . یالڭز حپسدن صوڭره خدمت نوریه برقاچ قسمه آیریلمشدی ؛ یالڭز تكثیر ماكینه سی و ال یازیسیله نشر ايتمه يله صینیرلی دگلدی . بو زمانلرده كی خدمت صفحه لری شو صورتله افاده اولونابیلیر :
١ - مختلف ولایت ، قصبه و كویلرده كی نور طلبه لری ، بولوندقلری محيطلرنده نورلري اوقومق ، یازمق ، اوقوتمق و نشرینه چالیشمق …
٢ - اسپارطه و اینه بولیده ، تكثیر ماكینه سیله نور رساله لرينڭ مجموعه لر حالنده تكثيري و اطرافه نشری … [١٣]
بدیع الزمان حضرتلری ، كتابلرڭ تكثیر ماكینه سی ویا مطبعه یاردیمیله چوغالتيلوب اسكیسنه كوره داها قولای الده ایدیلمه سنڭ ، رساله لری الله یازمە خدمتنده بر كوشكلگه سبب اولمسنی ايسته مييوردي . بو قونوده كی دوشونجه سني تكثیر ماكینه سی ایلك فعالیته باشلادیغی زمان طلبه لره كوندردیگی بر مكتوبله شو شكلده افاده ایتمشدر :
” سكز یوز صحيفه يي بیڭ و بش یوز نسخه یه و بر میلیون صحیفه لره چیقاران او ماكینه ، البته غیبدن امدادیمزه كلمش نورجی و بیڭ قلملی بر كاتبدر . اونڭ ایچون بعض صحیفه لری سونوك چیقسه ، ضرر یوقدر . پارلاق قسمی ، بزه شیمدیلك یتر . ایی اوقونمایان قسمی آیری یاپیلسین ؛ صوڭره الماس قلمليلر ( نور طلبه لری ) ، هر بری بر - ایكی نسخه یی اصلاح ایتسین .
بر زمان بر مملكته شیمندوفر ( ترن ) كلدیگی وقت ، آرابه جيلر ( آت آرابه جيلري ) تلاش ایدوب دیدیلر : ‘ بزم صنعتمز بوزولدی . ‘ حالبوكه شمندوفرڭ كلمه سیله مملكتده فعالیت چوغالديغندن ، فايطونجيلغه ایكی قات زیاده احتیاج اولمش . ان شأ اللّٰه اونڭ كبی نور یازیجیلری دگل توقّف ( طوراقلامه ) ، بلكه داها زیاده یازی ایله دفتر عمللرينه حسنات ( ثوابلر ) قيد ايده جكلر . “ [١٤]
كورولدیگی كبی حضرت استاد تكثیر ماكینه سنڭ چیقمه سیله یازی خدمتنڭ طوراقلامسي احتمالنی دوشونه رك بو نقطه دن طلبه لرینی چوق معنیدار بر تمثيلله ایقاظ ایدییور ، تكثیر ماكینه سنه باقوب دە یازی خدمتنی كوشتمەيڭ ، عكسنه چوغالتڭ مساژينى ویرییوردی . نور طلبه لرينڭ قرآن یازیسنی و آلفابه سني محافظه ایتمه لرینه و بالذّات نشر ايتمكده كي یوز شهید ثوابی [١٥] كبی غایت بویوك بر حسنه یی قزانمه لرینه سبب اولان بو خدمتڭ دوامی البته صوڭ درجه لزومليدر .
ایشته یوقاریده كی بو ایقاظه رغمًا ، بر سوره صوڭره یازی خدمتنده یاشانان قسمي بر ضعیفلامه دخی حضرت استادي صوڭ درجه متأثّر ایتمشدی . رسالۀ نورڭ نشرنده چوق مهم خدمتلری كچن و نور خدمتندەكي غیرتلری طولاییسیله بدیع الزمان حضرتلرینڭ چوق دفعه تقديرلرينه مظهر اولان حسن عاطف افندی حضرت استادڭ بالذّات شاهد اولدیغی بو قونوده كی أوزونتوسني شویله آڭلاتیر :
” عاطف قرداشم ، قرداشلر قلمی ( رساله لری یازمەیی ) بیراقدیلر . بنجه تكثيرڭ ( ماكينه يله چوغالتمه نڭ ) قیمتی یوقدر . قلمه صاريلسينلر . یازی یی بیراقدقلری ایچون چوق جانم صيقيلييور . “ [١٦]
بدیع الزمان حضرتلری ایلك كز ١٩٤٥ ییلنده كلن طلبلر سببیله عصای موسینڭ یڭی حرفله مطبعه ده باصيلمسي ایچون استانبوله گوندرمشدي ، فقط مطبعه جيلرڭ هیچ بری جسارت ایدوب ده بونی باصمه يي قبول ایتمه مشدی . خلق پارتيسنڭ ایچ سیاسی چكيشمه لر یاشادیغی و ایچندن بر غروبڭ آیریلارق دموقرات پارتي يي قورمه سنه سبب اولاجق اختلافلرڭ ياشانديغي او دونمده عصای موسینڭ یڭی حرفله طبعنڭ كرچكلشمسی پك چوق جهتله ضررلی اولاجقدی . بو محتمل ضررلری بدیع الزمان حضرتلری یازدیغی بر مكتوبله طلبه لرینه شویله صيره لامش ایدی .
” عزیز صدّیق قرداشلرم !
بن دنیایه باقمدیغم ایچون حالنی بیله مدم . حالبوكه استانبولده پرده آلتنده سیاسی فیرطینه لر و ادارۀ عرفیه ایچنده رسالۀ نور كبی عظمتلی بر اثر مطبوعات جهتیله شیمدی چیقسه ایدی علی كل حال او جریانلرڭ بر قسمی اونی التزام ایدرك ( طرفدار اولارق ) سیاست عالمنه تماس ايتديره جكديلر . بو ایسه بتون بتون رسالۀ نورڭ اخلاصنه و مسلگمزه مخالف و چوق ضررلی اولاجغی كبی قرآن معجز البیانڭ خطنی محافظه یه مأمور اولان رسالۀ نور او وظیفه علیهنده یڭی حروفه فتوا ویرییور طرزنده اهمیتلي بر ضرر اولاجقدي. هم بش جهتله عبادت حكمنده اولان رسالۀ نور كتابتی ( یازیلمه سی ) نقصانلاشاجقدي. هركس قولای اولان مطبوع نسخه لرینی آراياجقدي. هم ده ” سرًّا تنورات “ سریله حضرت علینڭ ( ر ض ) ( رساله لری كیزلیجه یازمە ) وصیتنی ترك ایتمك و ضررلی ، دغدغه لی مبارزه صورتنده هم اهل ضلالت ، هم اهل بدعه يه ، هم اهل سیاسته ، هم خارجی جریانلره قارشی جبهه لر آلمەیه مجبوریت اولوردی . دیمك حقمزده و رسالۀ نورڭ فتوحاتی حقّنده اڭ خیرلیسی استانبولده بو فیرطینه لر زماننده طبعنى تأخیر ایتمكدی . “ [١٧]
كورولدیگی كبی حضرت استادڭ رسالۀ نورڭ لاتین حرفلری ایله طبعي نقطه سنده اڭ بویوك اندیشه سی رسالۀ نورڭ قرآن حرفلریله یازارق نشرینه ضرر ویرمسی ، حتّا نقصانلاشديرمه سيدر . رسالۀ نور يازيسنڭ نقصانلاشمه سي ایسه رسالۀ نورڭ قرآن خطنی محافظه ایتمك كبی اڭ قدسی بر وظیفه سنه ضرر كلمسی ديمكدي .
عین حادثه مناسبتیله یازدیغی بڭزر بر مكتوبنده دە استاد بدیع الزمان شو افاده لری قوللانمشدر :
” اگر بو دفعه طبع اولسه یدی ، چوق ضررلری اولوب اونڭ ویردیگی منفعتی بوزاردي . از جمله : استانبول شیمدی باشقه بر طرزده سياستجيلرڭ اوجاغی حكمنه كچدیگندن هر حالده رسالۀ نوري سياستله بولاشديراجقديلر …
هم ایكنجی بر ضرر : قلمله خدمت ايمانيه يي یاپان قهرمان شاكردلرڭ یازیده شوقلری قیریلاجقدی . مطبعه یه اعتماد ایدوب حرارتله یازی یه چاليشماياجقلردي. بو ایسه پك بویوك بر ضرردر . هر نه ایسه داها بونڭ كبی اهمّیتلی ضررلر ترتّب ایده بیلیردی . جناب حقّ رحمت و كرمیله بو ضررلردن حمایه ایچون طبعي تأخير ایتدی . “ [١٨]
بتون بو افاده لر شونی آچیقجه كوسترییوركه رسالۀ نور خدمتنده قرآن حرفلریله خدمت ایتمك بویوك بر اساسدر . یڭی حرفلرله یاپیلاجق خدمتلر قرآن حرفلرینه ضرر ویرمەیه جك شكلده و مقدارلرده جائز اولابیلیر .
صوڭ اولارق ، یازی خدمتنڭ نه قدر بویوك أهمیتی اولدیغنی و يازمقده كي تك غایه نڭ یالڭز رساله لری چوغالتمقدن عبارت اولمدیغنی كوسترن رسالۀ نوردن أوچ مهم اقتباس :
” قلمله نورلره خدمت و صداقتله طلبه سی اولمه نڭ ایكی مهم نتیجه سی واردر :
١ - آيات قرآنيه نڭ اشارتیله ، ايمانله قبره كیرمكدر .
٢ - بتون شاكردلرڭ معنوی قزانچلرینه ، نور دائره سنده كی شركت معنویه سریله ، عموم اونلرڭ حسناتلرینه حصّه دار اولمقدر .
٣ - هم بو طلبه سزلك زماننده ، ملائكه لرڭ حرمتنه مظهر اولان طلبۀ علوم دينيه صنفنه داخل اولوب عالم برزخده - طالعي وارسه ، تام موفّق اولمشسه - حافظ علی و ” میوه “ ده بحثی كچن مشهور طلبه كبی ؛ شهدا حیاتنه مظهر اولمقدر . “ [١٩]
” رسالۀ نورڭ نشر كیفیتی ده تاریخده هیچ بر اثرده كورولمه مشدر . شویله كه : قرآن خطنی ( قرآن یازیسنی ) محافظه ایتمك خدمتیله ده موظّف اولان رسالۀ نورڭ ، محقّق قرآن یازیسیله نشر ايديلمسي لازمدی . اسكی یازی یاساق ایدیلمش و مطبعه لری قالدیریلمشدی . بدیع الزمانڭ پاره سی ، ثروتی يوقدي ؛ فقيردي ، دنیا متاعيله علاقه سی يوقدي . رساله لری ال ایله یازارق چوغالتانلر دە، آنجق ضروري احتیاجلرینی تأمین ایدییورلردی . رسالۀ نوري يازانلر ، قره قوللره كوتورولويور ، اشكنجه و أزیتلر یاپیلییور ، حپسلره آتيلييوردي . “ [٢٠]
” خط قرآنڭ رفعنه ( قرآن یازیسنی قالدیرمەیه ) چالیشانلری صوصديرملي يز . و قرآني اونوتديرمه يه نیت ایدنلرڭ نیتلرینی اونلره اونوتدیرملی یز . “ [٢١]
نتیجه :
استاد بدیع الزمان و رسالۀ نورڭ ، بو عصرڭ وظيفه ليسي اولارق قرآن حرفلرینی و اسلام یازیسنی محافظه ایتمه سی تاریخی بر حقيقتدر . و بو طوروم رسالۀ نورڭ قرآن و عالم اسلام آدينه تعقیب ایتدیگی بر وظيفه در . زیرا ملتمزی قرآن ایله و ماضيسيله باغلایان اڭ بویوك وسیله قرآن حرفلریدر . اسلام ملتلری آراسنده اڭ بویوك بر باغ ، اڭ مهم بر كوپرودر . بو سببله حرفلرڭ دگیشدیریلمسی بو وطن و ملته چوق بویوك معنوی ضررلر ویرمشدر . توركیه تاریخنده بو معنوی تخریباته قارشی ، پلانلی ، سیستملی و جماعت حالنده بر چاليشمه يله مقابله ایدن ده استاد بدیع الزمان ایله نور طلبه لری اولمشدر . و باذن اللّٰه استاد بدیع الزمان و طلبه لری ، اڭ زور شرطلرده بو حرفلری محافظه خدمتنی ، اسلام شعائرینی و سنت سنیه یی قورومه يه یوڭلیك أوڭجه لكلی بر وظیفه شعوریله اجرا ایتمشلردر .
نور خدمتنڭ باشندن بری اسلام یازیسنی و حرفلرینی قورومه يي اڭ مهم بر دعوا اولارق طلبه لرینه سوركلی آڭلاتان ، بو خصوصده ١٨ . لمعه ، ٢٨ . لمعه ، رموزات ثمانیه كبی چوق صاييده رساله و بحثلر قلمه آلان ، عصرلر أوڭجه سندن حضرت علی ( كرم اللّٰه وجهه ) یازدیغی بر قصيده يله ، لاتین حرفلرینه و بونلره صاحب چیقان كوتو عالملره حدّت ایدوب طوقاتلادىغني ، قرآن یازیسنی محافظه ایدنلره ایسه محبّت ایدوب آلقيشلادىغني ، قرداشلری اولارق قبول ایتدیگنی ، طلبه لرینه خبر ویروب مژده له ین بر استاد ، هیچ ممكنمیدركه لاتین حرفلرینه الی نهایه جواز ویرسین ؟ عمر بویی تعقیب ایتدیگی بو حسّاسيتنى و بدعەلرله مجادله سني ترك ایتسین ؟ بو البته ممكن دگلدر . بدیع الزمان حضرتلری بویله بر تضاده دوشمكدن و بدعەلرله مجادله سني بیراقمقدن بریدر ، منزهدر .
استاد بديع الزمانڭ ١٩٥٣ - ٦٠ ییللری آراسنده اسپارطه ده اقامت ایتدیگی أو