بدیع الزمان سعید نورسی حضرتلرینڭ قسطمونیده قالدیغی ییللرده ، عزیز استادڭ عصرڭ وظیفه لی امامی و مجددی اولدیغنی كوسترن چوق عجیب و لطیف بر حادثه وقوع بولدی . أوڭجه كی عصرڭ مجددی اولان مولانا خالد بغدادی حضرتلرینڭ هدیه اولارق كوندردیگی جبّه و صاريغي ، بدیع الزمان حضرتلرینه خارقه بر صورتده اولاشدريلدي . حضرت استاد ، ” رسالۀ نور شاكردلرندن و آخرت همشيره مزدن آسیه نامندە بر خانم الیله او مبارك امانتی آلدم “ دییه افاده ایتدیگی بو حادثه یی حمد و ثنالر ایدرك شویله آڭلاتیر :

” اسكی زمانده ، اون درت یاشنده ایكن اجازت آلمه نڭ علامتی اولان استاد طرفندن صاریق صاردیرمق ، بر جبّه بڭا كییدیرمك وضعیتنه مانعلر بولوندی . یاشمڭ كوچكلگیله ، مملكتمزده بویوك خواجه لره مخصوص كسوه یی كییمك یاقیشمدیغی ؛ ثانیًا ، او زمانده بویوك عالملر ، بڭا قارشی استادلق وضعیتی دگل ، یا رقیب ویاخود تسلیمیت درجه سنه كیردكلری ایچون ، بڭا جبّه كییدیره جك و استادلق وضعیتنی آلاجق كندیلرینه كوگننلر بولونمدی . و اولياي عظیمەدن درت - بش ذاتڭ وفات ایتمه لری جهتنده ، اللی آلتی سنه در اجازتڭ ظاهر علامتی اولان جبه یی كییمك و بر استادڭ ألنی أوپمك ، استادلغنی قبول ایتمك حقمی بو كونلرده ، یوز سنه لك بر مسافه ده حضرت مولانا ذو الجناحین خالد ضیأ الدین كندی جبه سنی ، او جبه یه صاریلان بر صاریق ایله پك غریب بر طرزده بڭا كییدیرمك ایچون كوندرديگني بعض اماره لرله بڭا قناعت كلدی . بن ده او مبارك و یوز یاشنده جبه یی كیییورم . جناب حقّه  يوز بيڭلر شكر ایدییورم . “ [١]

قسطمونی حپسخانه سی مدیرینڭ أشی اولان آسیه خانم ، اصلاً آفيونلي اولوب دده سي كوچك عاشق لقبیله بیلینن محمد افندی ، أوڭجه كی عصرڭ مجددی ، بویوك نقشی شیخی مولانا خالد بغدادی حضرتلرینڭ طلبه لرندن ایدی . كوچك یاشده شامه  گيدره ك خدمتنه كیرمش ، اوزون سوره كندیسندن درس آلمشدی . نهایت مملكتنه دونه جگی زمان مولانا خالد حضرتلری صیرتنده كی جبه سنی چیقارارق كندیسنه كییدیرمش و أویله يوللامشدى . كندیسنده كی بو مبارك امانت ، اونڭ وفاتندن صوڭره أوڭجه اولادلرینه و داها صوڭره طورونی آسیه خانمه  انتقال ایتمش ، او دە ییللرجه بو مبارك خاطره یی كوزی كبی قورومشدي . بدیع الزمان حضرتلرینڭ قسطمونی یه كلیشندن صوڭره آسیه خانم اونڭ بو جبه یه لیاقتنی فرق ایدرك حضرت استاده  گوندرمشدي . حالبوكه او كونه قدر استاد كیمسه نڭ هدیه سنی اصلا قبول ايتمزكن بو مبارك هدیه یی هیچ اعتراض ایتمدن قبوللندي . چونكه یوقاریده كی مكتوبنده افاده ایتدیگی كبی ، كوردیگی بعض معنوی اشارتلرله ، مولانا خالد بغدادی حضرتلرینڭ بو جبه سنی كندیسنه كییدیرمك ایچون كوندردیگنه قناعت صاحبی اولمشدی . بو سببله بو مبارك هدیه یی یوز بیڭلر شكر ایدرك قبول ایتمشدر .

آڭلاشیلان او كه ، أوڭجه كی عصرڭ مجددی بدیع الزمان حضرتلرینڭ اجازت علامتی اولان بر جبه یی ياشنڭ كوچكلگی سببی ایله كيیمەيه جگني اللّٰهڭ اذنی ایله یوز سنه اولندن كورمش و اوڭا اولان شفقتنی یوز سنه لك بر مسافه دن جبه سنی كوندرمكله كوسترمشدر . یاشانان بو پك غریب حادثه ایسه ، حضرت استادڭ شو سوزلرینی خاطرلاتييوردي :

” بزم كبی حقیقت و آخرت قرداشلرڭ ، اختلاف زمان و مكان صحبتلرینه و انسیتلرینه بر مانع تشكیل ایتمز . بری شرقده ، بری غربده ، بری ماضيده ، بری مستقبلده ، بری دنیاده ، بری آخرتده اولسه دە برابر صاییلابیلیرلر و صحبت ایده بیلیرلر . “ [٢]

صوڭره كی ییللرده بدیع الزمان حضرتلری بو جبّه ایله نماز قیلاردی . حتّا دڭزلی حبسنە آلیندقلری سنه بو جبّه ده برابرنده يدي و دیگر قوغوشلرده بولونان طلبه لرینه كییدیرمك ایچون شو مكتوبله برابر كوندرمشدی :

” عزیز صدّیق قرداشلرم ! رسالۀ نور شاكردلریله چوق علاقه دار حضرت مولانا خالدڭ جبه سنی ؛ قرداشلریمزدن ثبات و صداقتنی محافظه ایتمك شرطیله ، هم مولانا خالدڭ هم رسالۀ نورڭ دائمی طلبه سی اولور نیتیله كییملی . هم باشقه قوغوشلرده كی قرداشلریمزه ده ویره بیلیرسڭز . فقط بن او جبّه ایله نماز قیلدیغم ایچون ، مذهبمزجه ، شدّتلی تمیزلك شرط اولدیغندن ، یاش یره قونولماسین ویا یاش اللر یاپیشماسین . “ [٣]

[ ١ ] عثمانلیجه قسطمونی لاحقه سی ، ص . ١٢١ كری

[ ٢ ] عثمانلیجه مكتوبات ، ص . ١٢٢ كری

[ ٣ ] عثمانلیجه شعاعلر ، ص . ٤١٧ كری