١٩٦٠ ییلی باشنده آنقره یه صوڭ دفعه كلیشنده استاد حضرتلری ، بتون نور جماعتنه خطاب ایدن صوڭ بر درس قلمه آلدیردی . داخلده ، یعنی اسلام مملكتلری ایچنده یاپیلاجق ایمان خدمتنده ” مثبت حركتڭ “ و ” معنوی جهادڭ “ لزومني ، بو زمانڭ سياستنده اهون الشر دینیلن دستورڭ ترجیح ایدیلمسی كرگنى و برقاچ مسئله یی داها تفصیلاتلی بر شكلده آكلاتوب درس ویردی . وفاتندن أوچ بچوق آی أوّل اولمسی حسبیله بر نوع وداع درسی اولان بو صوڭ درس شویله در :

” عزیز قرداشلرم !

بزم وظیفه مز مثبت ( اولوملی ) حركت ایتمكدر . منفی ( اولومسز ) حركت دگلدر . رضای الهی یه كوره صرف خدمت ايمانيه يي یاپمقدر ، وظيفۀ الهيه يه قاریشمامقدر . بزلر آسایشی محافظه یی نتیجه ویرن مثبت ایمان خدمتی ایچنده هر بر صیقینتی یه قارشی صبرله ، شكرله مكلفز . مثلا :

كندیمی مثال آلارق دیرم : بن اسكیدن بری تحكمه ( باصقی یه ) و ترذيله ( آشاغيلانمه يه ) قارشی بویون اگمەمشم . حیاتمده تحكمی قالديرمدىغم ، بر چوق حادثه لرله ثابت اولمش . مثلا : روسیه ده قوماندانه آیاغه قالقمامق ، ديوان حرب عرفيده اعدام تهديدينه قارشی محكمه ده كی پاشالرڭ سؤاللرینه بش پاره اهمّیت ويرمدىگم كبی ، درت قوماندانلره قارشی بو طورم تحكّملره بویون اگمدىگمي كوسترییور . فقط بو اوتوز سنه در مثبت حركت ایتمك ، منفی حركت ایتمه مك و وظيفۀ الهيه يه قاریشمامق حقیقتی ایچون ؛ بڭا قارشی یاپیلان معامله لره صبرله ، رضا ایله مقابله ایتدم . جرجیس علیه السّلام كبی و بدر ، احد محاربه لرنده چوق جفا چكنلر كبی صبر و رضا ایله قارشيلادم .

اوت ، مثلا : سكسان بر خطاسنی محكمه ده اثبات ایتدیگم بر مدعئ عمومنڭ ( صاوجینڭ ) یاڭلیش ادعالری ایله علیهمزده كی قرارینه قارشی ، بد دعا دخی ایتمدم . چونكه آصل مسئله بو زمانڭ جهاد معنويسيدر . معنوی تخریباتنه ( ييقيملره ) قارشی سد چكمكدر . بونڭله داخلی آسایشه بتون قوتمزله یاردیم ایتمكدر .

اوت ، مسلگمزده قوت وار . فقط بو قوت ، آسایشی محافظه ایتمك ایچوندر . وَلَا تَزِرُ وَازِرَةٌ وِزْرَ اُخْرٰى ( كیمسه كیمسه نڭ كناهیله مسئول اولماز ) دستوری ایله كه : ‘ بر جاني یوزندن ؛ اونڭ قرداشی ، خانداني ، چولوق - چوجغی مسئول اولاماز . ‘ ایشته بونڭ ایچوندركه ، بتون حیاتمده بتون قوتمله آسایشی محافظه یه چالیشمشم . بو قوت داخله قارشی دگل ، آنجق خارجی تجاوزه قارشی استعمال ایدیله بیلیر . مذكور آیتڭ دستوری ایله وظیفه مز ، داخلده كی آسایشه بتون قوتمزله یاردیم ایتمكدر . اونڭ ایچوندركه ، عالم اسلامده آسایشی اخلال ایدیجی داخلی محاربات ( صاواشلر ) آنجق بیڭده بر اولمشدر . او دە ، آراده كی بر اجتهاد فرقندن ایلری كلمشدر . و جهاد معنويەنڭ اڭ بویوك شرطی دە ؛ وظيفۀ الهيه يه قاريشمامقدركه ، بزم وظیفه مز خدمتدر ، نتیجه جناب حقّه  عائددر ؛ بز وظیفه مزی یاپمقله مجبور و مكلفز .

بن ده جلال الدّین خوارزمشاه كبی ، ” بنم وظیفه م خدمت ایمانیه در ؛ موفّق ایتمك ویا ایتمه مك جناب حقڭ وظيفه سيدر “ دییوب اخلاص ایله حركت ایتمه یی قرآندن درس آلمشم .

خارجی ( طیشاریدن كلن ) تجاوزه قارشی قوتله مقابله ایدیلیر . چونكه دشمانڭ مالی ، چولوق - چوجغی غنیمت حكمنه كچر . داخلده ایسه أویله دگلدر . داخلده كی حركت مثبت بر شكلده معنوی تخریباته قارشی معنوی ، اخلاص سري ایله حركت ایتمكدر . خارجده كی ( طيشده كي ) جهاد باشقه ، داخلده كی ( ايچده كي ) جهاد باشقه در . شیمدی میلیونلر حقيقي طلبه لری جناب حقّ بڭا ویرمش . بز بتون قوتمزله داخلده آنجق آسایشی محافظه ایچون مثبت حركت ایده جگز . بو زمانده داخل و خارجده كی جهاد معنويه ده كي فرق ، پك عظیمدر ( بیوكدر ) .

بر مسئله داها وار . او دە چوق اهمیتلیدر . حكم قرآنه  گوره ، بو زمانده میمسز مدنیتڭ ایجاباتندن اولارق حاجات ضروريه ( ضروري احتیاجلر ) درتدن یگرمی یه چیقمش . ترياكيلكله ، كوره نكله و اعتيادله ( آليشقانلقله ) حاجات غير ضروريه ، حاجات ضروريه حكمنه كچمش . آخرته ایمان ایتدیگی حالده ، ضرورت ( مجبوریت ) وار دییه و ضرورت ظنیله دنیا منفعتی و معیشت ( كچیم ) دردی ایچون دنیایی آخرته ترجیح ایدییور .

قرق سنه أوّل بر باش قوماندان بنی بر پارچه دنیایه آلیشدیرمق ایچون بعض قوماندانلری ، حتّا خواجه لری بنم یانمه كوندردی . اونلر دیدیلر : ‘ بز شیمدی مجبورز . اِنَّ الضَّرُورَاتِ تُب۪يحُ الْمَحْظُورَاتِ ( ضرورتلر حرامی حلال قیلار ) قاعده سیله آوروپه نڭ بعض اصوللرینی ، مدنیتڭ ايجابلريني تقلیده مجبورزدیديلر . بن ده دیدم : ‘ چوق آلدانمشسڭز . ضرورت سوء اختیاردن ( اراده سنی كوتویه قوللانمقدن ) كلسه قطعیاً طوغری دگلدر ، حرامی حلال ایتمز . سوء اختیاردن كلمزسه ، یعنی ضرورت حرام یولیله اولمامش ایسه ، ضرری یوق . مثلا : بر آدم سوء اختیاری ایله حرام بر طرزده كندینی سرخوش ایتسه و سرخوشلقله بر جنایت یاپسه ؛ حكم علیهنه جاري ( كچرلی ) اولور ، معذور صاییلماز ، جزا كورور . چونكه سوء اختیاری ایله بو ضرورت میدانه كلمشدر . فقط بر مجذوب چوجق جذبه حالنده بریسنی اورسه معذوردر ، جزا كورمز . چونكه اختیاری داخلنده دگلدر . ‘ طوغری

ایشته ، بن او قوماندانه و خواجه لره دیدم : اكمك ییمك ، یاشامق كبی ضروري احتیاجلر خارجنده باشقه هانگی ضرورت وار ؟ سوء اختیاردن ، غیر مشروع میللردن و حرام معامله لردن تولّد ایدن ( طوغان ) حركتلر ، حرامی حلال ایتمگه مدار اولامازلر . سینامه ، تییاترو ، دانس كبی شیلرده تریاكی اولمش ایسه ، مطلق ضرورت اولمادیغی و سوء اختیاردن كلدیگی ایچون ، حرامی حلال ایتمگه سبب اولاماز . كانون بشري ده بو نقطه لری نظره آلمشكه ؛ اختیار خارجنده ضرورت قطعيه ایله ، سوء اختیاردن نشئت ایدن ( چیقان ) حكملری آییرمشدر . كانون الٰهيده ایسه ، داها اساسلی و محكم بر شكلده بو اساسلر تفریق ایدیلمش .

بونڭله برابر زمانڭ الجاآتي ایله ( زورلامه لريله ) ضرورتلر اورته لقده ظن ایدرك بعض خواجه لرڭ بدعالره طرفدارلغندن طولایی اونلره هجوم ایتمەییڭز . بيلمەيه رك ضرورت وار ظنيله حركت ایدن او بیچاره لره وورمايیڭز . اونڭ ایچون قوتمزی داخلده صرف ایتمییورز . بیچاره ، ضرورت درجه سنه كیرمش ، بزه مخالف اولانلردن خواجه دە اولسه اونلره ایلیشمه ییڭز . بن تك باشمله داها أوّل علیهمده كی او قدر معارضلره قارشی طايانديغم ، ذرّه قدر فتور كتيرمدىگم ( كوشه مدىگم ) ، او خدمت ايمانيه ده موفّق اولدیغم حالده ؛ شیمدی میلیونلر نور طلبه سی اولدیغی حالده ، یینه مثبت حركت ایتمكله اونلرڭ بتون تحقيراتلرينه ، ظلملرینه تحمّل ایدییورم .

بز دنیایه باقمييورز . باقدیغمز وقتده اونلره یاردیمجی اولارق چالیشییورز . آسایشی محافظه یه مثبت بر شكلده یاردیم ایدییورز . ایشته بو كبی حقیقتلر اعتباریله ، بزه ظلم ده ایتسه لر خوش كورمه لی ییز .

رسالۀ نورڭ نشری هر طرفده قناعت تامّه ویردیكه ، دموقراتلر دینه طرفداردرلر . شیمدی بر رساله یه ایلیشمك ؛ وطن ، ملّت مصلحتنه تمامًا ضددر . بر محرم رساله واردیكه ، او محرم رساله نڭ نشرینی منع ایتمشدم . ‘ ئولدكدن صوڭره نشر اولونسون دیمشدم . صوڭره محكمه لر آلوب اوقودیلر ، تدقیق ایتدیلر ؛ صوڭره برائت ویردیلر . محكمۀ تمییز ، او برائتی تصدیق ایتدی . بن ده بونی داخلده آسایشی تأمین ایچون و یوزده طقسان بش معصومه ضرر كلمه مسی ایچون نشر ايدنلره اذن ویردم . ” سعید ، مشورتله نشر ايده بيلير “ دیدم .

اوچنجی مسئله : شیمدی كفر مطلق ، أویله جهنّم معنوي ( معنوی بر جهنّم ) نشرینه چاليشييوركه ، كائناتده هیچ بر كافر اوڭا ياناشمامق لازم كلییور . قرآنڭ ” رحمةً للعالمین “ اولدیغنڭ بر سري بودركه : ناصل مسلمانلره رحمتدر ؛ آخرته ایمان ، اللّٰهه  ايمان احتمالنی ویرمسیله ده ، بتون دینسزلره و بتون علمه و نوع بشره رحمت اولمه سنه بر نكته ، بر اشارتدركه ؛ او معنوی جهنمدن دنیاده دە اونلری بر درجه قورتارمش . حالبوكه شیمدی فن و فلسفه نڭ ضلالت قسمی ؛ یعنی قرآنله باريشمايان ، یولدن چیقمش ، قرآنه  مخالفت ایدن قسمی ، كفر مطلقی قومونیستلر طرزنده نشره باشلادیلر . قومونیستلك پرده سنده آنارشیستلگی نتیجه ویره جك بر صورتده منافقلر ، زندیقلر واسطه سیله و بعض مفرط ( آشیری كیدن ) دینسز سياستجيلر واسطه سیله نشر ایله آشيلانمەیه باشلانديغي ایچون ؛ شیمدیكی حیات ، دینسز اولارق قابل دگلدر ، یاشاماز . ” دینسز بر ملّت یاشاماز “ حكمی بو نقطه یه اشارتدر . كفر مطلق اولدیغی زمان ، حقيقت حالده ياشانماز . اونڭ ایچون قرآن حكیم ، بو عصرده بر معجزۀ معنویه سی اولارق رسالۀ نور شاكردلرینه بو درسی ویرمشكه ؛ كفر مطلقه ، آنارشیستلگه قارشی سد چكسین . هم چكمش .

اوت ، چيني ، هم یاری آوروپه یی و بالقانلري استیلا ایدن بو جریانه قارشی بزی محافظه ایدن قرآن حكیمڭ بو درسيدركه ؛ او هجومه قارشی سد چكمش ، بو صورتله او تهلكه یه قارشی چاره بولمشدر .

دیمك بر مسلمان ممكن دگل ، باشقه بر دینه كیروب ، یا خریستییان و يهودي ، خصوصًا بولشه ویك كبی اولمق . چونكه بر عیسوی مسلمان اولسه ، عیسی عليه السّلامي داها زیاده سور . بر موسوي مسلمان اولسه ، موسی عليه السّلامي داها زیاده سور . فقط بر مسلمان ، محمد علیه الصّلات والسلامڭ زنجیرندن چیقسه ، دیننی بیراقسه ، داها هیچ بر دینه كیرمز ، آنارشیست اولور ؛ روحنده كمالاته مدار هیچ بر حالت قالماز . وجدانی تفسّخ ایدر ( بوزولور ) ، حیات اجتماعیه یه ( طوپلومه ) بر زهر اولور .

اونڭ ایچون جناب حقّه  شكر قرآن حكیمڭ اشارات غيبيه سي ایله قهرمان تورك و عرب ملتلری ایچنده لسان توركي و عربی ایله بو عصری قورتاراجق بر معجزۀ قرآنيه نڭ رسالۀ نور نامیله بر درسی انتشاره باشلامش . و اون آلتی سنه أوّل آلتی یوز بیڭ آدمڭ ایماننی قورتاردیغی كبی ، شیمدی ميليونلردن كچدیگی ثابت اولمش . دیمك رسالۀ نور ؛ بشري ( انسانلغی ) آنارشیلكدن ( تروریزمدن ) قورتارمەیه بر درجه وسیله اولدیغی كبی ، اسلامڭ ایكی قهرمان قرداشی اولان تورك و عربي برلشديرمه يه ، بو قرآنڭ كانون اساسيلريني ( آناياسالريني ) نشر ايتمگه وسیله اولدیغنی دوشمانلر دە تصدیق ایدییورلر .

مادام بو زمانده كفر مطلق قرآنه  قارشي چیقییور . كفر مطلقده جهنمدن زیاده دنیاده دە داها بویوك بر جهنّم وار . چونكه ئولوم مادام ئولدیریلمییور . هر كون بشرده اوتوز بیڭ جنازه ئولومڭ دوامنه شهادت ایدییور . بو ئولوم كفر مطلقه دوشنلره ، یاخود طرفدار اولانلره ؛ هم شخصڭ اعدام ابديسي ( أبدی یوقلغی ) و بتون كچمش ، كله جك اقربالرینڭ دە اعدام ابديسي اولارق دوشوندیگی ایچون ، جهنمدن اون دفعه داها فضله دهشتلی جهنّم عذابی چكر . دیمك او جهنّم عذابنی كفر مطلقله قلبنده دویویور . چونكه هر بر انسان اقرباسنڭ سعادتیله مسعود ، عذابیله معذّب اولدیغی ( عذاب چكدیگی ) كبی ؛ اللّٰهي انكار ایدنلرڭ اعتقادلرنجه بتون او سعادتلری محو اولویور ، یرینه عذابلر كلییور . ایشته بو زمانده ، بو دنیاده بو معنوی جهنّمي انسانلرڭ قلبندن ازاله ایدن تك بر چاره سی وار : او دە قرآن حكیمدر . و بو زمانڭ فهمنه ( آڭلاییشنه ) كوره اونڭ بر معجزۀ معنویه سی ( معنوی معجزه سی ) اولان رسالۀ نور اجزالریدر .

شیمدی اللّٰهه  شكر ايدييورزكه ، سیاسی پارتيلر ایچنده بر پارتی ، بر پارچه بونی حس ایتديكه ؛ او اثرلرڭ نشرینه مانع اولمدی ؛ حقائق ايمانيه نڭ ( ایمان حقیقتلرینڭ ) دنیاده بر جنّت معنويه يي اهل ایمانه قزاندیردیغنی اثبات ایدن رسالۀ نوره  ممانعات ایتمدی ( مانع اولمدی ) ، نشرینه مساعده كار طاوراندي ؛ ناشرلرینه ده تضييقاتدن ( باصقيدن ) واز گچدی .

قرداشلرم ! خسته لغم پك شدّتلی ، بلكه پك یاقینده ئوله جگم ویاخود بتون بتون قونوشمقدن - بعضًا منع اولدیغم كبی - منع ایدیله جگم . اونڭ ایچون بنم نور آخرت قرداشلرم ، اهون الشر ( ایكی شردن داها خفیف اولانی ) دییوب بعض بیچاره ياڭليشچيلرڭ خطالرینه هجوم ایتمه سینلر . دائما مثبت حركت ایتسینلر . منفی حركت وظیفه مز دگل . چونكه داخلده حركت منفیجه اولماز . مادام سياستجيلرڭ بر قسمی رسالۀ نوره  ضرر ویرمییور ، آز مساعدەكاردر ؛ اهون الشر اولارق باقیڭز . داها اعظم الشردن ( داها بویوك شردن ) قورتولمق ایچون ؛ اونلره ضرريڭز طوقونماسین ، اونلره فائده ڭز طوقونسون .

هم داخلده كی جهاد معنوی ؛ معنوی تخریباته قارشی چاليشمقدركه ؛ مادی دگل ، معنوی خدمتلر لازمدر . اونڭ ایچون اهل سیاسته قاريشمدىغمز كبی ، اهل سیاست ده بزمله مشغول اولمەیە هیچ بر حقلری یوق .

مثلا : بر پارتی بڭا بیڭلر وجه ایله ( يوڭدن ) صیقینتی ویردیگی حالده ، حتّا اوتوز سنه ده حپسلر ده تضييقلر ده اولدیغی حالده ، حقمی حلال ایتدم . و عذابلرینه مقابل ، او بیچاره لرڭ یوزده طقسان بشنی تزییف و اعتراضلره ، ظلملره معروض قالمقدن قورتولمه یه وسیله اولدمكه ،

وَلَا تَزِرُ وَازِرَةٌ وِزْرَ اُخْرٰى ( كیمسه كیمسه نڭ كناهیله مسئول اولماز ) آیتی حكمنجه قباحت آنجق یوزده بشه ویریلدی . او علیهمزده كی پارتينڭ شیمدی هیچ بر جهتله علیهمزده شكوایه ( شكایته ) حقلری یوقدر .

حتّا بر محكمه ده یاڭلیش مخبرلرڭ و جاسوسلرڭ اوهاملری ایله بزی ، یتمش كیشی یی ، محكوم ایتمك ایچون سوء فهميله ( كوتو آڭلایشیله ) ، دقتسزلگی ایله رسالۀ نورڭ بعض قسملرینه یاڭلیش معنا ویره رك سكسان ياڭليشله بنی محكوم ایتمەیه چالیشدیغی حالده ، محكمه لرده اثبات ایدیلدیگی كبی ، اڭ زیاده هجومه معروض بر قرداشڭز ، محبوس ایكن پنجره دن او مدعئ عمومینڭ أوچ یاشنده كی چوجغنی كوردی ، صوردی ، دیدیلر : ” بو مدعئ عمومینڭ قيزيدر “ او معصومڭ خاطری ایچون او مدعی یه بد دعا ایتمدی . بلكه اونڭ ویردیگی زحمتلر ؛ او رسالۀ نورڭ ، او معجزۀ معنويه نڭ انتشارینه ( ياييلمه سنه ) ، اعلاننه بر وسیله اولدیغی ایچون رحمتلره انقلاب ایتدی .

قرداشلرم ، بلكه بن ئوله جگم . بو زمانڭ بر خسته لغی داها وار ؛ او دە بنلك ، انانیت ، خودفروشلق ، حیاتنی كوزلجه مدنیت فانتازيه سيله كچیرمك اشتهاسی ، تریاكیلك كبی خسته لقلردر . رسالۀ نورڭ قرآندن آلدیغی درسڭ اڭ برنجی اساسی : بنلك ، انانیت ، خودفروشلغي ترك ایتمك لزوميدر . تا اخلاص حقيقي ایله ایمانڭ قورتاریلمه سنه خدمت ایدیلسین . جناب حقّه  شكر ، او اعظمی اخلاصی قازانانلرڭ پك چوق افرادی ( فردلری ) میدانه چیقمش . بنلگنی ، شان و شرفنی اڭ كوچك بر مسئلۀ ايمانيه يه فدا ایدن چوقدر . حتّا نورڭ بیچاره بر شاكردینڭ دوشمانلری دوست اولدیغی وقت اونڭله صحبت ایتمك چوغالدیغی ایچون ، رحمت الهیه جهتنده سسی كسیلمش . هم ده اوڭا تقديرله باقانلر ، اصابت نظر ( نظر دگمسي ) حكمنه كچوب اونی اینجیتییور . حتّا مصافحه ایتمك ده طوقات وورمق كبی صیقینتی ویرییور . ‘ سنڭ بو وضعیتڭ نه در ؟ ‘ دییه صورولدی ، ‘ مادام میلیونلر قدر آرقداشلرڭ وار ، نەدن بونلرڭ خاطرلرینی محافظه ایتمه یورسڭ ؟ ‘ جواباً دیدی :

– مادام مسلگمز اعظمی اخلاصدر ؛ دگل بنلك ، انانیت ، دنیا سلطنتی دە ویریلسه ، باقی بر مسئلۀ ايمانيه يي او سلطنته ترجیح ایتمك اعظمی اخلاصڭ اقتضاسیدر . مثلا : حرب ایچنده ، آوجی خطنده ، دشمانڭ طوپ كله لری آراسنده قرآن حكیمڭ تك بر آیتنڭ ، تك بر حرفنڭ ، تك بر نكته سنی ترجیح ایدرك ، او كله لر ایچنده حبیب كاتبنه دفتري چیقار ! ‘ دییه رك آت أوستنده او نكته یی یازدیرمش . دیمك قرآنڭ بر حرفنڭ بر نكته سنی ، دشمانڭ كله لرينه قارشی ترك ایتمه مش ؛ روحنڭ قورتولمه سنه ترجیح ایتمش .

او قرداشمزه صوردق : ” بو عجیب اخلاصی نره دن درس آلمشسڭ ؟ “

دیمش : ایكی نقطه دن :

بریسی : عالم اسلامیتڭ اڭ عجیب حربی اولان بدر حربنده نماز وقتنده جماعتدن حصه سز قالمامق ایچون ، دشمانڭ هجومی ایله برابر مجاهدلرڭ یاریسی سلاحنی بیراقوب جماعت خیرینه شریك اولمق ، ایكی ركعت صوڭره اونلر دە حصّه دار اولسون دییه فخر عالم علیه الصّلات والسلام بر حديث شريفيله امر ایتمش اولمه سیدر . مادام حربده بو رخصت وار . و مادام جماعت خیری دە سنّت اولدیغی حالده ، او سنته رعایت ایتمك اڭ بویوك بر حادثۀ دنيويه يه ترجیح ایدیلمش . استاد مطلقڭ بویله بر اشارتندن بر نكته جك آلارق ، بز ده روح و جانمزله اتّباع ایدییورز .

ایكنجیسی : قهرمان اسلام ، امام علی رضی اللّٰه عنه ، جلجلوتیه نڭ چوق یرلرنده و آخرنده بر حمايه جي ( قورویوجی ) ايسته مشكه ، نماز ایچنده حضورینه غفلت كلمه سین . دوشمانلری طرفندن اوڭا بر هجوم معناسی خاطرینه كلمه مك ، صرف نمازده كی حضورینه پك چوق اولان دوشمانلری طرفندن بر هجوم تصوریله نمازده كی حضورینه مانع اولونمامق ایچون بر محافظ عفريتي ( جني ) درگاه الٰهيدن نیاز ایتمش .

ایشته بو بیچاره ، عمری بو زمانده خودفروشلق ( كوستریش ) ایچنده یووارلانان بیچاره قرداشڭز ده ؛ هم سبب خلقت عالمدن ، هم قهرمان اسلامدن بو ایكی كوچك نكته یی درس آلدم . و بو زمانده چوق لازم اولان قرآنڭ اسرارینه ( اینجه معنالرینه ) اهمّیت ویرمكله ، حرب ایچنده روحنڭ محافظه سنی دیڭله مه یه رك ، قرآنڭ بر حرفنڭ بر نكته سنی بیان ایتمش .

سعید نورسی “ [١]

[ ١ ] امرطاغ لاحقه سی - ٢ ، ص . ٢٤١ كری